ಸೂಗೂರೇಶ್ವರ ದೇವಸ್ಥಾನ ಅಭಿಷೇಕಕ್ಕೆ 1250 ರೂ. ಶುಲ್ಕ,ಭಕ್ತರರಿಂದ ಆಕ್ರೋಶ.

*ಹಣ ಪಡೆದು ರಸೀದಿ ಕೊಟ್ಟು ವಾಪಸ್ ಪಡೆಯುತ್ತಿರುವ ಅರ್ಚಕರು.

ಕಿಷ್ಕಿಂಧವಾಣಿ ಸುದ್ದಿ

ರಾಯಚೂರು: ಜಿಲ್ಲೆಯ ಆರಾಧ್ಯ ದೈವವಾಗಿರುವ ದೇವಸುಗೂರು ಶಕ್ತಿನಗರದ ಶ್ರೀ ಸೂಗೂರೇಶ್ವರ ದೇವಸ್ಥಾನದಲ್ಲಿ ಅಭಿಷೇಕ ಕಾರ್ಯಕ್ರಮಕ್ಕೆ 1250ರೂ. ಶುಲ್ಕವನ್ನು ಭಕ್ತರಿಂದ ಪಡೆದು ರಸೀದಿ ಕೊಟ್ಟು ನಂತರ ಅರ್ಚಕರೇ ರಶೀದಿಯನ್ನು ವಾಪಸ್ ಪಡೆದುಕೊಳ್ಳುತ್ತಿರುವುದು ಅನುಮಾನಕ್ಕೀಡು ಮಾಡಿದೆ ಎಂದು ಸೂಗೂರೇಶ್ವರ ದೇವಸ್ಥಾನದ ಗಂಗಾವತಿ ಭಕ್ತರಾದ ಬಸವರಾಜ್ ಇಂಗಳಗಿ, ಶರಣಪ್ಪ ಇಂಗಳಗಿ ಇತರ ಭಕ್ತರು ದೇವಸ್ಥಾನ ಆಡಳಿತ ಮಂಡಳಿ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ.

ಶ್ರಾವಣ ಮಾಸದ ನಿಮಿತ್ಯ ರಾಯಚೂರು ಕೊಪ್ಪಳ ಬಳ್ಳಾರಿ ಯಾದಗಿರಿ ಸೇರಿದಂತೆ ಆಂಧ್ರಪ್ರದೇಶದಿಂದ ಸಾವಿರಾರು ಭಕ್ತರು ಸೂಗೂರೇಶ್ವರ ದೇವಸ್ಥಾನಕ್ಕೆ ಆಗಮಿಸಿ ತಮ್ಮ ಭಕ್ತಿ ಸೇವೆಯನ್ನು ಮಾಡುತ್ತಾರೆ.

ಈ ಹಿಂದೆ ದೇವಸ್ಥಾನದ ಆಡಳಿತ ಮಂಡಳಿ ನಿರ್ಧಾರದಂತೆ ದೇವಸ್ಥಾನ 2000 ರೂ. ಗಳ ಅಜೀವ ಸದಸ್ಯತ್ವ ಪಡೆದ ಭಕ್ತರಿಗೆ ಉಚಿತವಾಗಿ ದೇವರ ಅಭಿಷೇಕ ಮಾಡುವ ಪದ್ದತಿ ಇದ್ದು, ಅಜೀವ ಸದಸ್ಯತ್ವ ಹೊಂದದೇ ಇರುವವರು 250 ರೂ.ಗಳ ಕೊಟ್ಟು ರಸೀದಿ ಪಡೆದು ಅಭಿಷೇಕ ಮಾಡಿಸಬೇಕಿದ್ದು ಈ ಭಾರಿ ಏಕಾಏಕಿ 1250 ರೂ.ಗಳನ್ನು ಅಭಿಷೇಕ ಶುಲ್ಕ ಎಂದು ರಸೀದಿ ನೀಡಿ ಅದನ್ನು ಭಕ್ತರಿಗೆ ಕೊಡದೇ ವಾಪಸ್ ಅರ್ಚಕರು ಪಡೆದುಕೊಳ್ಳುತ್ತಿದ್ದು ಹಲವು ಅನುಮಾನಗಳಿಗೆ ಅಸ್ಪದ ಮಾಡಿದೆ ಎಂದು ಭಕ್ತರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.ಈ ಕುರಿತು ದೇವಾಲಯದ ಧಾರ್ಮಿಕ ವೃತ್ತಿ ಅಧಿಕಾರಿಗಳನ್ನು ಕೇಳಿದರೆ ಅಧಿಕಾರಿಗಳು ನಿರ್ಲಕ್ಷದ ಉತ್ತರ ನೀಡಿದ್ದಾರೆ. ಶ್ರಾವಣ ಮಾಸದ ಸಂದರ್ಭದಲ್ಲಿ ದೇವಸ್ಥಾನಕ್ಕೆ ಸಾವಿರಾರು ಜನ ಭಕ್ತರು ಆಗಮಿಸುತ್ತಿರುವುದರಿಂದ ಲಕ್ಷಾಂತರ ರೂಪಾಯಿ ಹಣ ವಸೂಲಿಯಾಗುತ್ತಿದ್ದು, ಭಕ್ತರಿಗೆ ರಶೀದಿ ನೀಡದೆ ಇರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.

ಈ ಕುರಿತು ಸಂಬಂಧ ಪಟ್ಟ ಹಿರಿಯ ಅಧಿಕಾರಿಗಳಿಗೆ ಫೋನ್ ಮುಖಾಂತರ ಸಂಪರ್ಕಿಸಿದರು ಅವರು ಫೋನ್ ಕರೆಯನ್ನು ಸ್ವೀಕಾರ ಮಾಡುತ್ತಿಲ್ಲ ಎಂದು ಭಕ್ತರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

****

ಶ್ರೀಸೂಗೂರೇಶ್ವರ ದೇವಾಲಯದಲ್ಲಿ ಹಣ ವಸೂಲಿ ಕುರಿತು ಭಕ್ತರು ಆಕ್ರೋಶ ವ್ಯಕ್ತಪಡಿಸಿದ್ದು,ನಮ್ಮ ಕುಟುಂಬದ ಸದಸ್ಯರು ಶ್ರಾವಣ ಸೋಮವಾರ ದೇವಾಲಯಕ್ಕೆ ತೆರಳಿ ಅಭಿಷೇಕ ಮಾಡಲು ರಸೀದಿ ಪಡೆಯಲು ಹೋದ ಸಂದರ್ಭದಲ್ಲಿ 1250ರೂ.ವಸೂಲಿ ಮಾಡಿ ರಸೀದಿ ನೀಡಿ ನಂತರ ಗರ್ಭಗುಡಿಯಲ್ಲಿ ರಸೀದಿ ವಾಪಸ್ ಪಡೆಯಲಾಗಿದೆ.

ಇದು ಅನುಮಾನಕ್ಕೀಡು ಮಾಡಿದ್ದು ಕೂಡಲೇ ಧಾರ್ಮಿಕ ದತ್ತಿ ಇಲಾಖೆಯವರು ತನಿಖೆ ನಡೆಸಿ ಹೆಚ್ಚುವರಿ ಹಣ ಪಡೆಯುತ್ತಿರುವವರನ್ನು ತಡೆಯಬೇಕಿದೆ.ಭಕ್ತರ ನಂಬಿಕೆ ಉಳಿಸಬೇಕು.

-ಅಮರೇಶಪ್ಪ ಇಂಗಳಗಿ ಅಜೀವ ಅಭಿಷೇಕ ಸೇವಾಕರ್ತರು ಗಂಗಾವತಿ.

ಏಳುಗುಡ್ಡ ಪ್ರದೇಶದಲ್ಲಿ ಹುಲಿ ಸೆರೆಗಾಗಿ ತೀವ್ರಗೊಂಡ ಕಾರ್ಯಾಚರಣೆ.

*ಸಾರ್ವಜನಿಕರು ಸಹಕರಿಸಲು ಮನವಿ

ಕಿಷ್ಕಿಂಧವಾಣಿ ಸುದ್ದಿ

ಗಂಗಾವತಿ: ಕೊಪ್ಪಳ ತಾಲ್ಲೂಕಿನ ಗ್ರಾಮಗಳಾದ ಬಸಾಪುರ, ಬಂಡಿಹರ್ಲಾಪುರ, ಶಿವಪುರ, ಹಾಗೂ ಗಂಗಾವತಿ ತಾಲ್ಲೂಕಿನ ಲಕ್ಷ್ಮೀಪುರ, ಸಾಣಾಪುರ, ತೆಂಬಾ, ಮಲ್ಲಾಪುರ, ಅರಣ್ಯದಂಚಿನ ಪ್ರದೇಶಗಳಲ್ಲಿ ಹುಲಿ ಕಂಡುಬಂದಿರುವುದು ದೃಢಪಟ್ಟಿದ್ದು, ಹುಲಿ ರಕ್ಷಣಾ ಕಾರ್ಯಾಚರಣೆ ಪ್ರಗತಿಯಲ್ಲಿದೆ.

ಆ.28 ಶುಕ್ರವಾರ ರಂದು ರಕ್ಷಣಾ ಕಾರ್ಯಾಚರಣೆಯ ಅಂಗವಾಗಿ ಅರಣ್ಯ ಪ್ರದೇಶಗಳಲ್ಲಿ ಬೋನುಗಳನ್ನು ಹಾಗೂ ಕ್ಯಾಮೆರಾ ಟ್ರ್ಯಾಪ್‌ಗಳನ್ನು ಅಳವಡಿಸಲಾಗಿದೆ. ಥರ್ಮಲ್ ಡೋನ್ ಕಾರ್ಯಾಚರಣೆಯನ್ನು ಕೈಗೊಳ್ಳಲಾಗಿದ್ದು, ಮೈಸೂರು ವಿಭಾಗದ ಆನೆ ಕಾರ್ಯಪಡೆ ಮತ್ತು ಚಿರತೆ ಕಾರ್ಯಪಡೆ ಸಿಬ್ಬಂದಿ ಮತ್ತು ಡೋನ್ ತಜ್ಞರ ತಂಡವು ಡೋನ್ ಮೂಲಕ ಹುಲಿ ಶೋಧನಾ ಕಾರ್ಯವನ್ನು ಕೈಗೊಳ್ಳಲಾಗುತ್ತಿದ್ದು, ಹುಲಿಯ ಚಲನವಲನದ ಕುರಿತು ಯಾವುದೇ ಕುರುಹು ದೊರೆತಿರುವುದಿಲ್ಲ. ಅರಣ್ಯ ಇಲಾಖೆಯ ಸಿಬ್ಬಂದಿಗಳ ತಂಡಗಳು ನಿರಂತರವಾಗಿ ಗಸ್ತು ಕಾರ್ಯ ನಿರ್ವಹಿಸುತ್ತಿದ್ದು, ಮುಂಜಾಗೃತ ಕ್ರಮವಾಗಿ ಗದಗ ಬಿಂಕದಕಟ್ಟಿ ಝೂ ಮತ್ತು ಕಮಲಾಪುರ ಅಟಲ್ ಬಿಹಾರಿ ವಾಜಪೇಯಿ ಝೂ ದಿಂದ ವೈದ್ಯಾಧಿಕಾರಿಗಳ ತಂಡವನ್ನು ಕಾರ್ಯಚರಣೆಯಲ್ಲಿ ಉಪಯೋಗಿಸಕೊಳ್ಳಲಾಗಿದೆ. ಸಾರ್ವಜನಿಕರು ರಾತ್ರಿ ಸಮಯದಲ್ಲಿ ಅರಣ್ಯ ಪ್ರದೇಶದ ಹತ್ತಿರದ ಹೊಲ/ಗದ್ದೆಗಳಿಗೆ ಹೋಗದಂತೆ ಮತ್ತು ಅರಣ್ಯ ಪ್ರದೇಶಗಳಿಗೆ ಪ್ರವೇಶಿಸದಂತೆ, ಜಾನುವಾರುಗಳನ್ನು ಅರಣ್ಯ ಪ್ರದೇಶದಲ್ಲಿ ಬಿಡದಂತೆ ಹಾಗೂ ಅರಣ್ಯ ಇಲಾಖೆಯ ಸೂಚನೆಗಳನ್ನು ಪಾಲಿಸಿ ಜಾಗೃತರಾಗಿರುವಂತೆ ತಿಳಿಸಲಾಗಿದೆ. ಹಾಗೂ ಹುಲಿಯ ಇರುವಿಕೆ ಕಂಡುಬಂದಲ್ಲಿ ಕೂಡಲೇ ಅರಣ್ಯ ಇಲಾಖೆಯ ಅಧಿಕಾರಿಗಳ ದೂರವಾಣಿ ಸಂಖ್ಯೆ: 7676790171, 9902794977 ಗಳಿಗೆ ಸಂಪರ್ಕಿಸಲು ತಿಳಿಸಿದೆ.

ತೀವ್ರಗೊಂಡ ಹುಲಿ ಸೆರೆಹಿಡಿಯುವ ಕಾರ್ಯಾಚರಣೆ, ಸಿಸಿ ಕ್ಯಾಮರಾಗಳ ಪರಿಶೀಲನೆ

*ಏಳುಗುಡ್ಡ ಪ್ರದೇಶದತ್ತ ತೆರಳದಂತೆ ಗ್ರಾಮಗಳಲ್ಲಿ ಮುನ್ನೆಚ್ಚರಿಕೆ.

*ಸ್ಥಳಕ್ಕೆ ಬಳ್ಳಾರಿ ಐಜಿ ಡಾ.ಹರ್ಷ ಭೇಟಿ

ಕಿಷ್ಕಿಂಧವಾಣಿ ಸುದ್ದಿ

ಗಂಗಾವತಿ: ತಾಲೂಕಿನ ಏಳು ಗುಡ್ಡ ಪ್ರದೇಶದಲ್ಲಿ ಹುಲಿ ಪತ್ತೆಯಾದ ನಂತರ ಜಿಲ್ಲಾಡಳಿತ ಅರಣ್ಯ ಇಲಾಖೆ ಜಂಟಿ ಆಶ್ರಯದಲ್ಲಿ ಈಗಾಗಲೇ ಹುಲಿಯನ್ನು ಸೆರೆ ಹಿಡಿಯುವ ಕಾರ್ಯಾಚರಣೆ ನಡೆಯುತ್ತಿದ್ದು,ಏಳು ಗುಡ್ಡ ಪ್ರದೇಶದಾದ್ಯಂತ ಸಿಸಿ ಕ್ಯಾಮರಗಳನ್ನು ಅಳವಡಿಸಲಾಗಿದೆ.ಆ. 25 ನಂತರ ಹುಲಿ ಸಂಚಾರ ಮಾಡುವ ಕುರಿತು ಯಾವುದೇ ಸಿಸಿ ಕ್ಯಾಮೆರಾ ಗಳಲ್ಲಿ ಫೋಟೋ ಮತ್ತು ವಿಡಿಯೋ ಪತ್ತೆಯಾಗಿಲ್ಲ.ಆದರೂ ನಿರಂತರವಾಗಿ ಅರಣ್ಯ ಪೊಲೀಸ್ ಮತ್ತು ಕಂದಾಯ ಇಲಾಖೆ ಜಂಟಿಯಾಗಿ ಸಿಸಿ ಕ್ಯಾಮೆರಾಗಳ ಪೋಟೇಜ್ ಮತ್ತು ವಿಡಿಯೋಗಳನ್ನು ಪರಿಶೀಲನೆ ಮಾಡಲಾಗುತ್ತದೆ.
ಗುರುವಾರ ಏಳುಗುಡ್ಡ ಪ್ರದೇಶದ ಹುಲಿ ಸೆರೆ ಹಿಡಿಯುವ ಕಾರ್ಯಾಚರಣೆ ಮಾಹಿತಿ ಪಡೆಯಲು ಮತ್ತು ಸೂಕ್ತವಾದ ಮಾರ್ಗದರ್ಶನ ನೀಡಲು ಬಳ್ಳಾರಿ ವಲಯ ಪೊಲೀಸ್ ಮಹಾನಿರ್ದೇಶಕ ಡಾ.ಹರ್ಷ ಭೇಟಿ ನೀಡಿ ಜಿಲ್ಲಾ ಅರಣ್ಯ ಸಂರಕ್ಷಣಾಧಿಕಾರಿ ಎನ್.ಕೆ.ನಿರ್ಮಲಾ ಅವರಿಂದ ಮಾಹಿತಿ ಪಡೆದರು. ಏಳುಗುಡ್ಡ ಪ್ರದೇಶದಲ್ಲಿ ಅಳವಡಿಸಿರುವ ಸಿಸಿ ಕ್ಯಾಮರಾಗಳಲ್ಲಿ ಸೆರೆಯಾಗಿರುವ ದೃಶ್ಯಗಳನ್ನು ವೀಕ್ಷಣೆ ಮಾಡಿದರು.

ಈ ಸಂದರ್ಭದಲ್ಲಿ ಎಸಿಎಫ್ ಅಬ್ದುಲ್ ಖಾದರ ಮುಲ್ಲಾ, ಗಂಗಾವತಿ ಆರ್ ಎಫ್ ಓ ಬಸವರಾಜ್ ಎಮ್ ಪೂಜಾರಿ ಸೇರಿದಂತೆ ಅರಣ್ಯ ಇಲಾಖೆಯ ಅಧಿಕಾರಿಗಳಿದ್ದರು.

ತುಂಗಭದ್ರಾ ಡ್ಯಾಂ ನಿರ್ಮಾಣಕ್ಕೂ ಮುಂಚೆ ಗಂಗಾವತಿ ಅರಣ್ಯ ಪ್ರದೇಶ ಹುಲಿಗಳ ತಾಣ!

ಕಿಷ್ಕಿಂಧವಾಣಿ ವಿಶೇಷ

ಕೆ.ಪವನ ಕುಮಾರ.

ಕರ್ನಾಟಕದ ಗಂಗಾವತಿಯಲ್ಲಿ ತುಂಗಭದ್ರಾಾರ ಡ್ಯಾಮ್ ನಿರ್ಮಾಣಕ್ಕು ಮೊದಲು ಹುಲಿಗಳ ಐತಿಹಾಸಿಕ ಉಪಸ್ಥಿತಿ ಮತ್ತು ಮಾನವ ಅಭಿವೃದ್ಧಿಯು ಅವುಗಳ ನೈಸರ್ಗಿಕ ಕಾರಿಡಾರ್ ನೈಸರ್ಗಿಕ ಸೃಷ್ಠಿ ಇತ್ತು.
ಐತಿಹಾಸಿಕ ಹುಲಿ ಆವಾಸಸ್ಥಾನ(ಕಾರಿಡಾರ್):ಒಂದು ಕಾಲದಲ್ಲಿ ಪಶ್ಚಿಮ ಘಟ್ಟಗಳನ್ನು ಶ್ರೀಶೈಲಕ್ಕೆ ಸಂಪರ್ಕಿಸುವ ನೈಸರ್ಗಿಕ ವನ್ಯಜೀವಿ ಮಾರ್ಗವಿತ್ತು.
ತೆಂಬಾ ಅರಣ್ಯ: ಗಂಗಾವತಿ ಮತ್ತು ಬೂದುಗುಂಪ ಗ್ರಾಮದ ಮಧ್ಯದಲ್ಲಿರುವ ಏಳು ಗುಡ್ಡ ಪ್ರದೇಶದಲ್ಲಿ ತೆಂಬಾ ಎನ್ನುವ ಬೆಟ್ಟ ಪ್ರದೇಶ ಹುಲಿಗಳಿಗೆ ಅಚ್ಚುಮೆಚ್ಚಿನ ತಾಣವಾಗಿತ್ತು.ಈ ಸ್ಥಳೀಯ ಅರಣ್ಯ ಪ್ರದೇಶವು ಹುಲಿಗಳಿಗೆ ಮತ್ತು ಜಿಂಕೆಗಳಂತಹ ಹೇರಳವಾದ ಬೇಟೆಗಳಿಗೆ ನೈಸರ್ಗಿಕ ನೆಲೆಯಾಗಿತ್ತು.
ಹುಲಿ ಗ್ರಾಮ:ಹತ್ತಿರದಲ್ಲಿ ಮುಳುಗಿದ್ದ ಒಂದು ಪ್ರದೇಶಕ್ಕೆ ” ಹುಲಿಗ್ರಾಮ ” ಎಂದು ಹೆಸರಿಸಲಾಯಿತು, ಇದರ ಅರ್ಥ “ಟೈಗರ್ ವಿಲೇಜ್” ಎಂದಾಗಿದ್ದು , ಹುಲಿಗಳ ಉಪಸ್ಥಿತಿ ಹೇರಳವಾಗಿತ್ತು.
ಅಭಿವೃದ್ಧಿಯ ಪರಿಣಾಮ:ತುಂಗಭದ್ರಾ ಅಣೆಕಟ್ಟು 1950 ರ ದಶಕದಲ್ಲಿ ಅಣೆಕಟ್ಟು ನಿರ್ಮಾಣವು ಸ್ಥಳೀಯ ಹಳ್ಳಿಗಳನ್ನು ಪ್ರವಾಹಕ್ಕೆ ಸಿಲುಕಿಸಿತು ಮತ್ತು ವನ್ಯಜೀವಿ ಕಾರಿಡಾರ್ ಅನ್ನು ವಿಭಜಿಸಿತು.
ಆವಾಸಸ್ಥಾನ ನಷ್ಟ: ನೀರಾವರಿ ಯೋಜನೆಗಳು ಮತ್ತು ಮಾನವ ವಸತಿಗಳು ಬದುಕುಳಿದ ಹುಲಿಗಳನ್ನು ಇತರ ಕಾಡುಗಳ ಕಡೆಗೆ ಸ್ಥಳಾಂತರಿಸಲು ಪ್ರೇರೇಪಿಸಿದವು.
ಬೇಟೆ ಮತ್ತು ಸಂರಕ್ಷಣ:ರಾಯಲ್ ಬೇಟೆಗಳು ಕಾನೂನು ರಕ್ಷಣೆಗಳು ಅಸ್ತಿತ್ವದಲ್ಲಿರುವುದಕ್ಕಿಂತ ಮೊದಲೇ ಘೋರ್ಪಡೆ ಹಾಗೂ ಆನೆಗೊಂದಿ ರಾಜಮನೆತನವು ಆಹ್ವಾನಿತ ಅತಿಥಿಗಳೊಂದಿಗೆ ಈ ಪ್ರದೇಶದಲ್ಲಿ ಸಾಂಪ್ರದಾಯಿಕ ಹುಲಿ ಬೇಟೆಗಳನ್ನು ಆಯೋಜಿಸುತ್ತಿತ್ತು.
ಕಾನೂನು ಬದಲಾವಣೆಗಳು: 1971 ರಲ್ಲಿ ವನ್ಯಜೀವಿ ಸಂರಕ್ಷಣಾ ಕಾಯ್ದೆಯನ್ನು ಪರಿಚಯಿಸಿದ ನಂತರ ಹುಲಿ ಬೇಟೆಯನ್ನು ಕಾನೂನುಬದ್ಧವಾಗಿ ನಿರ್ಬಂಧಿಸಲಾಯಿತು.
ಇತ್ತೀಚಿನ ದೃಶ್ಯಗಳು:ಹುಲಿಗಳ ಮರಳುವಿಕೆ: ಗಂಗಾವತಿ ಬಳಿ ಹುಲಿ ಕಾಣಿಸಿಕೊಂಡ ಇತ್ತೀಚಿನ ವರದಿಗಳು ಹಳೆಯ ವನ್ಯಜೀವಿ ಕಾರಿಡಾರ್ ಇನ್ನೂ ಪರಿಸರ ಮೌಲ್ಯವನ್ನು ಹೊಂದಿರಬಹುದು ಎಂದು ಸೂಚಿಸುತ್ತವೆ.
ಏಳು ಗುಡ್ಡ ಪ್ರದೇಶವನ್ನು ವನ್ಯಜೀವಿಗಳ ಮೂಲ ತಾಣವನ್ನಾಗಿ ರಾಜ್ಯ ಮತ್ತು ಕೇಂದ್ರ ಸರ್ಕಾರ ಘೋಷಣೆ ಮಾಡುವ ಮೂಲಕ ಇಲ್ಲಿ ಚಿರತೆ ಕರಡಿ ತೋಳ ಮತ್ತು ಹುಲಿ ಸೇರಿದಂತೆ ಇತರೆ ವನ್ಯಜೀವಿಗಳನ್ನು ಸಂರಕ್ಷಿಸಿ ಕಾಪಾಡುವ ಮಹತ್ವದ ಯೋಜನೆ, ಘೋಷಣೆ ಮಾಡುವಂತೆ ವನ್ಯಜೀವಿ ಪರಿಸರ ತಜ್ಞರು ಅಭಿಪ್ರಾಯಪಡುತ್ತಿದ್ದಾರೆ.

ಗಂಗಾವತಿ ರಾಯರಮಠದಲ್ಲಿ ಶ್ರೀ ರಾಘವೇಂದ್ರ ತೀರ್ಥ ಗುರುಸಾರ್ವಭೌಮರ 355ನೇ ಆರಾಧನೆಗೆ ಸಿದ್ಧತೆ.

ಕಿಷ್ಕಿಂಧವಾಣಿ ಸುದ್ದಿ

ಗಂಗಾವತಿ:

ಶ್ರೀ ರಾಘವೇಂದ್ರ ತೀರ್ಥ ಗುರುಸಾರ್ವಭೌಮರ 355 ಆರಾಧನಾ ಮಹೋತ್ಸವವನ್ನು ಜಗದ್ಗುರು be ಮನ್ಮಧ್ವಾಚಾರ್ಯರ ಮೂಲ ಮಹಾ ಸಂಸ್ಥಾನಾಧೀಶ್ವರರಾದ ನಂಜನಗೂಡು ರಾಘವೇಂದ್ರ ಸ್ವಾಮಿಗಳವರ ಮಠದ ವೇದಾಂತ ದಿಗ್ವಿಜಯ ವಿದ್ಯಾ ಸಿಂಹಾಸನಾಧೀಶ್ವರರಾದ ಪ್ರಾತಃ ಸ್ಮರಣೀಯ ಶ್ರೀ ಶ್ರೀ ಸುಯತೀಂದ್ರ ತೀರ್ಥ ಶ್ರೀಪಾದಂಗಳವರ ಕರಕಮಲ ಸಂಜಾತರು, ಪ್ರಸ್ತುತ ಮಂತ್ರಾಲಯ ಪೀಠಾಧಿಪತಿಗಳಾದ ಪರಮಪೂಜ್ಯ ಶ್ರೀ 1008 ಶ್ರೀ ಶ್ರೀ ಡಾ. ಸುಬುಧೇಂದ್ರ ತೀರ್ಥ ಶ್ರೀಪಾದಂಗಳವರ ಆಜ್ಞಾನುಸಾರ ಇದೇ ಶ್ರೀ ಪರಾಭವನಾಮ ಸಂವತ್ಸರದ ಶ್ರಾವಣ ಬಹುಳ ಪ್ರತಿಪದ, ದ್ವಿತೀಯ ಹಾಗೂ ತೃತೀಯ ದಿನತ್ರಯಗಳಲ್ಲಿ ನಡೆಸಲು ಸಿದ್ಧತೆಗಳು ನಡೆದಿವೆ.

ಈ ಕುರಿತು ನಗರದ ರಾಯರ ಮಠದಲ್ಲಿ ಆ. 29, 30 ಮತ್ತು 31ರ ಶನಿವಾರ, ಭಾನುವಾರ, ಸೋಮವಾರದಂದು ಪೂಜ್ಯ ಸುಭುದೇಂದ್ರತೀರ್ಥ ಶ್ರೀಪಾದಂಗಳ ಪ್ರೇರಣಾನುಸಾರ ಶ್ರೀಮನ್ಮಧ್ವಾಚಾರ್ಯ ಮೂಲಮಹಾಸಂಸ್ಥಾನ ನಂಜನಗೂಡು ಶ್ರೀ ರಾಘವೇಂದ್ರಸ್ವಾಮಿಗಳವರ ಮೂಲ ಮೃತ್ತಿಕ ಬೃಂದಾವನ ಸನ್ನಿಧಾನದಲ್ಲಿ ನೆರವೇರಿಸಲಾಗುತ್ತಿದೆ. ಆ.29ರ ಶನಿವಾರ ಪೂರ್ವಾರಾಧನೆ, 30ರ ಭಾನುವಾರ ಮಧ್ಯಾರಾಧನೆ ಮತ್ತು 31ರ ಸೋಮವಾರ ಉತ್ತರಾರಾಧನೆಯನ್ನು ಅತ್ಯಂತ ವೈಭವ ಹಾಗೂ ಶ್ರದ್ದಾಭಕ್ತಿಯಿಂದ ಆಚರಿಸಲಾಗುತ್ತಿದೆ.

ಶ್ರೀಹರಿ ಆಜ್ಞೆಯಂತೆ ಶ್ರೀಶಂಕುಕರ್ಣರೇ ಶ್ರೀ ಪ್ರಹ್ಲಾದರಾಜರಾಗಿ, ಶ್ರೀ ಪಾಕ್ಷೀಕರಾಜರಾಗಿ, ಶ್ರೀ ವ್ಯಾಸರಾಜರಾಗಿ ಅವತರಿಸಿ ವೈದಿಕ ಸಿದ್ಧಾಂತ ತತ್ವ ಧರ್ಮಗಳ ಪ್ರಚಾರಕ್ಕಾಗಿ ಲೋಕಮಾನ್ಯ ಗ್ರಂಥಗಳನ್ನು ರಚಿಸಿ ಸತತ ಪವನ ಆವೇಶಯುಕ್ತರಾದ ವಿಭೂತಿಪುರುಷರೇ ಶ್ರೀಶ್ರೀಶ್ರೀರಾಘವೇಂದ್ರತೀರ್ಥ ಶ್ರೀಪಾದಂಗಳವರು. ಈ ಮಹಾ ಮಹಿಮರು ತಮ್ಮನ್ನು ಆಶ್ರಯಿಸಿ ಬಂದ ಎಲ್ಲಾ ಭಕ್ತರ ರೋಗರುಜಿನಗಳನ್ನು ನಾಶಮಾಡಿ ಸಕಲ ಸಂಪತ್ತನ್ನು ನೀಡಿ ಭಕ್ತರ ಹಾಗೂ ಮಾನವ ಜನಾಂಗದ ಕಲ್ಯಾಣ ಮಾಡುತ್ತಾ ಜಗತ್ತಿನ ಶಾಂತಿ ಸ್ಥಾಪನೆಗಾಗಿ ತಮ್ಮ ಅಖಂಡ ಪುಣ್ಯ ರಾಶಿಯನ್ನು ಕಾಮಧೇನು ಕಲ್ಪವೃಕ್ಷವಂತೆ ಧಾರೆಯೆರೆಯುತ್ತಾ ಮಂತ್ರಾಲಯ ಮಹಾಕ್ಷೇತ್ರದಲ್ಲಿ ಸಶರೀರವಾಗಿ ಬೃಂದಾವನ ಪ್ರವೇಶ ಮಾಡಿರುವ ಅಗಮ್ಯ ಮಹಿಮರು.

ಆ. 28ರಂದು ಶುಕ್ರವಾರ ಯಜುರ್ವೇದ ನಿತ್ಯ ನೂತನ ಉಪಾಕರ್ಮ, ಬೆಳಿಗ್ಗೆ 10 ಗಂಟೆಗೆ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ, ಸಂಜೆ 6 ಗಂಟೆಗೆ ಧ್ವಜಾರೋಹಣ ಗೋಪೂಜಾ, ಪ್ರಾರ್ಥನೋತ್ಸವ, ಶಾಕೋತ್ಸವ, ಧನ-ಧಾನ್ಯಪೂಜಾ, ಶ್ರೇಯಃ ಪ್ರಾರ್ಥನೆ, ಮಹಾಮಂಗಳಾರತಿ, ಆ.31ರಂದು ಸೋಮವಾರ ಉತ್ತರಾರಾಧನೆ ನಿಮಿತ್ತ ಬೆಳಗ್ಗೆ 9ಕ್ಕೆ ಮಹಾ ರಥೋತ್ಸವ, ಸೆ. 1ರಂದು ಮಂಗಳವಾರ ಸಾಮಾಹಿಕ ಶ್ರೀ ಪವಮಾನ ಹೋಮ ಬೆಳಗ್ಗೆ 9 ರಿಂದ 11.30 ರವರೆಗೆ ಜರುಗಲಿದೆ. ಆರಾಧನೆ ನಿಮಿತ್ತ ಪ್ರತಿನಿತ್ಯ ಬೆಳಗಿನ ಜಾವ 5ರಿಂದ 5.30ರವರೆಗೆ ಸುಪ್ರಭಾತ, 05.30 ರಿಂದ 6 ನಿರ್ಮಾಲ್ಯ ವಿಸರ್ಜನೆ, 6 ರಿಂದ 7 ಗಂಟೆಯವರೆಗೆ ವೇದ ಪಾರಾಯಣ, 7ರಿಂದ 8 ಗಂಟೆಯವರೆಗೆ ಪಂಚಾಮೃತಾಭಿಷೇಕ, 10 ರಿಂದ 11 ಗಂಟೆಯವರೆಗೆ ಕನಕ ಮಹಾಪೂಜೆ, 11 ಕ್ಕೆ ಅರ್ಚನೆ ನೈವೇದ್ಯ, ಅಲಂಕಾರ, ಹಸ್ತೋದಕ ಮತ್ತು ಮಹಾ ಮಂಗಳಾರತಿ, ಸಾಯಂಕಾಲ 6 ರಿಂದ 7ರವರೆಗೆ ಉತ್ಸವ, ಸ್ವಸ್ತಿ ವಾಚನ ಮತ್ತು ಮಹಾಮಂಗಳಾರತಿ, ಪ್ರತಿ ನಿತ್ಯ ಸಂಜೆ 7 ಗಂಟೆಗೆ ದಾಸವಾಣಿ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ಜರುಗಲಿವೆ.

ಈ ದಿನಗಳಲ್ಲಿ ಸದ್ಭಕ್ತರು ಶ್ರೀ ಗುರುರಾಯರ ಸೇವೆಮಾಡಿ ತೀರ್ಥ-ಪ್ರಸಾದ, ಫಲಮಂತ್ರಾಕ್ಷತೆಗಳನ್ನು ಸ್ವೀಕರಿಸಿ ಶ್ರೀ ರಾಘವೇಂದ್ರ ತೀರ್ಥ ಗುರುಸಾರ್ವಭೌಮರ ಸಂಪೂರ್ಣ ಅನುಗ್ರಹಕ್ಕೆ ಪಾತ್ರರಾಗಬೇಕೆಂದು ವಿಚಾರಣಾಕರ್ತ ರಾಮಕೃಷ್ಣ ಜಾಗೀರದಾರ, ವ್ಯವಸ್ಥಾಪಕ ಗುರುರಾಜಾಚಾರ್ಯ(ಸಾಮವೇದ) ಹಾಗೂ ಸಿಬ್ಬಂದಿ ವರ್ಗದವರು ತಿಳಿಸಿದ್ದಾರೆ.

ಹುಲಿ ಪ್ರತ್ಯಕ್ಷ ಫೇಕ್ ವಿಡಿಯೋ ವೈರಲ್,ಜನರಲ್ಲಿ ಆತಂಕ ಮೂಡಿಸುತ್ತಿರುವ ಕಿಡಿಗೇಡಿಗಳು.ಅರಣ್ಯ, ಪೊಲೀಸ್ ಇಲಾಖೆಯಿಂದ ಕ್ರಮದ ಎಚ್ಚರಿಕೆ !

ಕಿಷ್ಕಿಂಧವಾಣಿ ವಿಶೇಷ

ಕೆ.ನಿಂಗಜ್ಜ

ಗಂಗಾವತಿ: ತಾಲೂಕಿನ ಏಳುಗುಡ್ಡ ಪ್ರದೇಶದಲ್ಲಿ ಹುಲಿ ಇರುವ ಕುರಿತು ಕಿಷ್ಕಿಂಧವಾಣಿ ದಿನಪತ್ರಿಕೆಯಲ್ಲಿ ಪ್ರಥಮವಾಗಿ ಜೂ.18 ರಂದು ಸ್ಥಳೀಯ ಕುರಿಗಾಯಿಗಳು, ದನಗಾಯಿಗಳು ನೀಡಿದ ಹುಲಿ ಹೆಜ್ಜೆಯ ಗುರುತುಗಳನ್ನಾಧರಿಸಿ ಹಲವು ವಿಸ್ತೃತ ವರದಿಗಳನ್ನು ಪ್ರಕಟಿಸಿದ ನಂತರ ಅರಣ್ಯ ಇಲಾಖೆಯವರು ಸಿಸಿ ಕ್ಯಾಮರಾಗಳನ್ನು ಅಳವಡಿಸಿದ್ದ ಹುಲಿ ಇರುವ ಕುರಿತು ಸಿಸಿ ಕ್ಯಾಮರಾಗಳಲ್ಲಿ ರೆಕಾರ್ಡ್ ಆದ ನಂತರ ಜಿಲ್ಲಾ ಅರಣ್ಯ ಇಲಾಖೆಯವರು ಹುಲಿಯನ್ನು ಸೆರೆ ಹಿಡಿಯಲು ಆ.25 ರಿಂದ ಕಾರ್ಯಾಚರಣೆ ನಡೆಸುತ್ತಿದ್ದಾರೆ.

ಈ ಮಧ್ಯೆ ಬುಧವಾರ ಮಧ್ಯಾನ್ಹ ದಿಂದ ಹುಲಿ ಘರ್ಜಿಸುವ ಮತ್ತು ಬೆಟ್ಟದಲ್ಲಿ ಸಂಚರಿಸುತ್ತಿರುವ ವಿಡಿಯೋ ಒಂದು ಸೋಶಿಯಲ್ ಮೀಡಿಯಾದಲ್ಲಿ ತುಂಬಾ ವೈರಲ್ ಆಗಿದ್ದು ಇದರಿಂದ ಆನೆಗೊಂದಿ, ಸಾಣಾಪೂರ, ಬಸಾಪೂರ,ಜಂಗ್ಲಿ ರಂಗಾಪೂರ, ಮಲ್ಲಾಪೂರ, ಹೇಮಗುಡ್ಡ,ಮುಕ್ಕುಂಪಿ,ಜಬ್ಬಲಗುಡ್ಡ, ಬೆಣಕಲ್ ಸೇರಿದಂತೆ ಏಳುಗುಡ್ಡ ಪ್ರದೇಶದ ಗ್ರಾಮಸ್ಥರು ಹಾಗೂ ಕುರಿಗಾಯಿಗಳು, ದನಗಾಯಿಗಳು ಆತಂಕಕ್ಕೆ ಒಳಗಾಗಿದ್ದಾರೆ.

ಈ ಕುರಿತು ಅರಣ್ಯ ಮತ್ತು ಪೊಲೀಸ್ ಇಲಾಖೆಯವರು ವೈರಲ್ ಆಗಿರುವ ಹುಲಿ ಘರ್ಜನೆಯ ವಿಡಿಯೋ ಕುರಿತು ದೃಢಪಡಿಸಿ ಸಾರ್ವಜನಿಕರ ಆತಂಕ ದೂರ ಮಾಡಬೇಕಿದೆ.

ಕಾರ್ಯಾಚರಣೆ ನಡೆಸುತ್ತಿರುವ ಅರಣ್ಯ ಇಲಾಖೆಯವರು ಗ್ರಾಮಗಳಲ್ಲಿ ಸೈರನ್ ಹಾಕುತ್ತಿದ್ದು,ಇನ್ನೂ ಸಹ ಏಳುಗುಡ್ಡ ಪ್ರದೇಶದಲ್ಲಿರುವ ತೆಂಬ,ರಾಯರ ಕೆರೆ ಸೇರಿ ಇತರೆಡೆ ದನಗಾಯಿಗಳು, ಕುರಿಗಾಯಿಗಳ ಜತೆ ಇರುವ ಕುರಿತು ಸ್ಥಳೀಯರು ಮಾಹಿತಿ ನೀಡಿದ್ದಾರೆ. ಇದೇ ಪ್ರದೇಶದಲ್ಲಿ ಹುಲಿ ಹಲವು ದನ,ಕರುಗಳನ್ನು ಕೊಂದಿದೆ.

ಅರಣ್ಯಪ್ರದೇಶದಲ್ಲಿ ಉಳಿದು ಕೊಂಡಿರುವ ದನ,ಕುರಿಗಾಯಿಗಳನ್ನು ಹೊರಗೆ ಕಳಿಸುವ ಮೂಲಕ ಹುಲಿಗೆ ಆಹಾರ ಸಿಗದಂತೆ ಮಾಡಿದಾಗ ಮಾತ್ರ ಅರಣ್ಯ ಇಲಾಖೆಯ ಬೋನಿಗೆ ಅದು ಬೀಳುವ ಸಾಧ್ಯತೆ ಇದೆ.

ಸಾರ್ವಜನಿಕರು ಸಹ ಫೇಕ್ ಪೊಟೋ ವಿಡಿಯೋಗಳನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಾಕುವುದು ಮತ್ತು ಫಾರ್ವರ್ಡ್ ಮಾಡುವುದನ್ನು ಮಾಡದೇ ಫೇಕ್ ವಿಡಿಯೋ, ಪೋಟೋ ಬಂತ ತಕ್ಷಣ ಅರಣ್ಯ, ಪೊಲೀಸ್ ಇಲಾಖೆ ಗಮನಕ್ಕೆ ತಂದು ಜಿಲ್ಲಾಡಳಿತದ ಜತೆ ಸಹಕರಿಸಬೇಕಿದೆ.

ತುಂಗಭದ್ರಾ ಎಡದಂಡೆ ಕಾಲುವೆ 22 ಮೈಲ್ ಹತ್ತಿರ ಎಡಭಾಗದಲ್ಲಿ ಸೋರಿಕೆ.ಸ್ಥಳಕ್ಕೆ ಜಲಸಂಪನ್ಮೂಲ ಇಲಾಖೆ ಅಧಿಕಾರಿಗಳ ಭೇಟಿ.

*ಅವೈಜ್ಞಾನಿಕವಾಗಿ ಕಾಲುವೆಗೆ ನೀರು ಹರಿಸುವುದೇ ಕಾಲುವೆ ಸೋರಿಕೆ ಕಾರಣ ರೈತರ ಆರೋಪ.

*ಭತ್ತ ನಾಟಿ ಮಾಡುವ ಸಂದರ್ಭದಲ್ಲಿಯೇ ಕಾಲುವೆಯಲ್ಲಿ ಪದೇ ಪದೇ ಸೋರಿಕೆಯ ಆತಂಕ.

*ಮೊದಲಿನಿಂದಲೂ ಸೋರಿಕೆ ಇದ್ದು ಆತಂಕಪಡುವ ಅವಶ್ಯಕತೆ ಇಲ್ಲ.ಎಇ

ಕಿಷ್ಕಿಂಧವಾಣಿ ಸುದ್ದಿ

ಗಂಗಾವತಿ:ತಾಲೂಕಿನ ಕೇಸಕ್ಕಿ ಹಂಚಿನಾಳ ಹತ್ತಿರ ತುಂಗಭದ್ರಾ ಎಡದಂಡೆ ಕಾಲುವೆಯ 22 ಮೈಲ್ ನಲ್ಲಿ ಎಡಭಾಗದಲ್ಲಿ ಮಂಗಳವಾರ ಮಧ್ಯಾನ್ಹ ಸೋರಿಕೆ ಕಂಡು ಬಂದಿದ್ದು, ಭಾರಿ ಪ್ರಮಾಣದಲ್ಲಿ ನೀರಿನ ಸೋರಿಕೆಯಾಗುತ್ತಿದೆ. ಭತ್ತದ ಸಸಿ ನಾಟಿ ಮಾಡುತ್ತಿರುವ ಅಚ್ಚುಕಟ್ಟು ಪ್ರದೇಶದ ರೈತರಲ್ಲಿ ತೀವ್ರ ಆತಂಕವುಂಟಾಗಿದೆ.
ಕೇಸಕ್ಕಿ ಹಂಚಿನಾಳ ಹತ್ತಿರ ಕಳೆದ ವರ್ಷ ಇದೇ ಸ್ಥಳದಲ್ಲಿ ಬಲಭಾಗದಲ್ಲಿ ಅಕ್ವಾಡೆಟ್ ಸೋರಿಕೆಯಾಗಿ‌ ಇಡೀ ಕಾಲುವೆ ಕುಸಿದು 15 ದಿನಗಳ ಕಾಲ ಕಾಲುವೆಯಲ್ಲಿ ನೀರು ನಿಲ್ಲಿಸಿ ಸಮರೋಪಾದಿಯಲ್ಲಿ ಕಾಲುವೆ ಕಾಮಗಾರಿ ನಡೆಸಿ ನೀರು ಹರಿಸಲಾಗಿತ್ತು.
ಇದೀಗ ಕಳೆದ ಜು.11ರಿಂದ ತುಂಗಭದ್ರಾ ಡ್ಯಾಂ ನಿಂದ ಎಡ,ಬಲ ಹಾಗೂ ರಾಯಬಸವ,ತುರ್ತುಕಾಲುವೆ ಹಾಗೂ ವಿಜಯನಗರ ಕಾಲುವೆಗಳಿಗೆ ನೀರು ಹರಿಸಲಾಗಿದ್ದು, ಕಳೆದ ವಾರ ತಾಲೂಕಿ ಜಂಗ್ಲಿ ರಂಗಾಪೂರ ಹತ್ತಿರ ಎಡದಂಡೆ ಕಾಲುವೆ ಇ.ಎಸ್ 775 ಹತ್ತಿರ ನೀರಿನ‌ ಸೋರಿಕೆಯಾಗಿತ್ತು.ಈ ಕುರಿತು ಕಿಷ್ಕಿಂಧವಾಣಿ ದಿನಪತ್ರಿಕೆ ರೈತರ ಮಾಹಿತಿ ಅನುಸರಿಸಿ ವಿಸ್ತೃತ ವರದಿ ಹಿನ್ನೆಲೆಯಲ್ಲಿ ಜಲಸಂಪನ್ಮೂಲ ಇಲಾಖೆಯ ಅಧಿಕಾರಿಗಳು ಕಾರ್ಯಪ್ರವೃತ್ತರಾಗಿ ನೀರು ಸೋರಿಕೆ ತಡೆಯುವಲ್ಲಿ ಯಶಸ್ವಿಯಾಗಿದ್ದರು.

ಅವೈಜ್ಞಾನಿಕವಾಗಿ ಕಾಲುವೆ ನೀರು; ತುಂಗಭದ್ರಾ ಎಡದಂಡೆಯ ಕಾಲುವೆಯಲ್ಲಿ ಕೊನೆಯ ಭಾಗದ ರೈತರಿಗೆ ಗೇಜ್ ಕೊಡುವ ಉದ್ದೇಶದಿಂದ ಅವೈಜ್ಞಾನಿಕವಾಗಿ 4100 ಕ್ಯೂಸೆಕ್ಸ್ ಗೂ ಹೆಚ್ಚು
ನೀರು ಹರಿಸುತ್ತಿರುವುದರಿಂದ ಕಾಲುವೆ ಒತ್ತಡ ತಾಣದೇ ಕೆಲ ಅಕ್ವಾಡೆಕ್ಟ್ ಸೇರಿ ಇತರೆಡೆ ಕಾಲುವೆಯಲ್ಲಿ ನೀರಿನ ಸೋರಿಕೆ ಮತ್ತು ಬೋಂಗಾ ಬೀಳುತ್ತಿದ್ದು ಕಾಲುವೆಯ ಕೆಳಭಾಗದ ತಾಲೂಕಿನ ಕೆಲ ರಾಜಕೀಯ ಧುರೀಣರು ಜಲಸಂಪನ್ಮೂಲ ಇಲಾಖೆಯ ಅಧಿಕಾರಿಗಳ ಮೇಲೆ ಒತ್ತಡ ತಂದು ಹೆಚ್ಚು ನೀರು ಹರಿಸುತ್ತಿರುವುದರಿಂದ ಕಾಲುವೆ ಭದ್ರತೆಯ ಪ್ರಶ್ನೆ ಮೂಡಿದ್ದು ಕಾಲುವೆಯ ಸಾಮರ್ಥ್ಯಕ್ಕೆ ತಕ್ಕಂತೆ ನೀರು ಹರಿಸುವಂತೆ ರೈತರು ಒತ್ತಾಯಿಸಿದ್ದಾರೆ.

***
ಕೇಸಕ್ಕಿ ಹಂಚಿನಾಳ ಹತ್ತಿರ
ಮೈಲ್ 22 ರಲ್ಲಿ ಎಡದಂಡೆ ಕಾಲುವೆ ಎಡಭಾಗದಲ್ಲಿ ನೀರಿನ ಸೋರಿಕೆ ಈ ಮೊದಲಿನಿಂದಲೂ ಇದ್ದು, ರೈತರು ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ. ಸೋಶಿಯಲ್ ಮೀಡಿಯಾದಲ್ಲಿ ಬರುವ ಗಾಳಿ ಸುದ್ದಿ ನಂಬಬಾರದು, ಕಾಲುವೆಯಲ್ಲಿ ಪ್ರಸ್ತುತ 4100ಕ್ಯೂಸೆಕ್ಸ್ ನೀರು ಹರಿಸಲಾಗುತ್ತಿದೆ.
ಸಣ್ಣ ಪುಟ್ಟ ಸೋರಿಕೆ ನಿಲ್ಲಿಸಲು ಅಗತ್ಯ ಕ್ರಮ ವಹಿಸಲು ಮೇಲಾಧಿಕಾರಿಗಳು ಸೂಚಿಸಿದ್ದಾರೆ.
ರೈತರು ಆತಂಕಪಡಬಾರದು.
-ನಾಗರಾಜ ಬರಗೂರು ಎಇ ಜಲಸಂಪನ್ಮೂಲ ಇಲಾಖೆ ವಡ್ಡರಹಟ್ಟಿ ವಿಭಾಗ.

ಏಳುಗುಡ್ಡ ಪ್ರದೇಶದಲ್ಲಿ ಪತ್ತೆಯಾದ ಹುಲಿ ಸೆರೆ ಹಿಡಿಯಲು ಆ.24ರಂದು ಕಾರ್ಯಾಚರಣೆ.

*ಸಾಣಾಪೂರ, ಆನೆಗೊಂದಿ ಮತ್ತು ಮಲ್ಲಾಪೂರ ವ್ಯಾಪ್ತಿಯಲ್ಲಿ ಕಾರ್ಯಾಚರಣೆ

*ಸುತ್ತಮುತ್ತಲಿನ ಗ್ರಾಮಗಳ ಜನರು ಸಹಕರಿಸಲು ಜಿಲ್ಲಾ ಪೊಲೀಸ್ ಮತ್ತು ಅರಣ್ಯ ಇಲಾಖೆ ಮನವಿ.

ಕಿಷ್ಕಿಂಧವಾಣಿ ಸುದ್ದಿ

ಗಂಗಾವತಿ: ಗ್ರಾಮೀಣ ಠಾಣಾ ವ್ಯಾಪ್ತಿಯ ಆನೆಗೊಂದಿ, ಸಾಣಾಪೂರ, ಮಲ್ಲಾಪೂರ ವ್ಯಾಪ್ತಿಯ ಏಳುಗುಡ್ಡ ಪ್ರದೇಶದ ಅಧಿಸೂಚಿತ ಅರಣ್ಯ ಪ್ರದೇಶದ ಸರ್ವೆ ನಂ. 1 ರಲ್ಲಿ ಅಳವಡಿಸಲಾಗಿದ್ದ ಸಿಸಿ ಕ್ಯಾಮರಾದಲ್ಲಿ ಹುಲಿ ಕಂಡುಬಂದಿದ್ದು, ಆ. 24- ರಂದು ಸೋಮವಾರ ಉಪ ಅರಣ್ಯ ಸಂರಕ್ಷಣಾಧಿಕಾರಿಗಳು, ಕೊಪ್ಪಳ ವಿಭಾಗದ ವತಿಯಿಂದ ಹುಲಿ ಸೆರೆಹಿಡಿಯುವ ಕಾರ್ಯಾಚರಣೆ ಹಮ್ಮಿಕೊಂಡಿದ್ದು, ಈ ಸಂದರ್ಭದಲ್ಲಿ ಸಮಯದಲ್ಲಿ ಸಾರ್ವಜನಿಕರ ನಿಯಂತ್ರಣಕ್ಕೆ ಸೂಕ್ತ ಸಹಕಾರ ನೀಡುವಂತೆ ಅರಣ್ಯ ಇಲಾಖೆಯ ಪೊಲೀಸ್ ಇಲಾಖೆಯನ್ನು ಮನವಿ ಮಾಡಿದೆ.
ಆ. 24 ರಂದು ಸೋಮವಾರ ಉಪ ಅರಣ್ಯ ಸಂರಕ್ಷಣಾಧಿಕಾರಿಗಳು, ಕೊಪ್ಪಳ ವಿಭಾಗ, ಕೊಪ್ಪಳ ವತಿಯಿಂದ ಹುಲಿ ಸೆರೆಹಿಡಿಯುವ ಕಾರ್ಯಾಚರಣೆ ಸಮಯದಲ್ಲಿ ಜನಜಂಗುಳಿ ನಿಯಂತ್ರಿಸಲು, ಅರಣ್ಯ ಇಲಾಖೆ ಅಧಿಕಾರಿಗಳೊಂದಿಗೆ ಸಮನ್ವಯ ಸಾಧಿಸಿ, ಕಟ್ಟುನಿಟ್ಟಾಗಿ ಪಾಲನೆ ಮಾಡಿ, ಸೂಕ್ತ ಪೊಲೀಸ್ ಬಂದೋಬಸ್ತ್ ಒದಗಿಸುವಂತೆ ಎಸ್ಪಿ ಡಾ.ರಾಮ್ ಎಲ್ ಅರಸಿದ್ದಿ ಗಂಗಾವತಿ ಡಿವೈಎಸ್ಪಿ ಹಾಗೂ ಗ್ರಾಮೀಣ ಸಿಪಿಐ ಅವರಿಗೆ ಸೂಚನೆ ನೀಡಿದ್ದಾರೆ.
ಹುಲಿ ಸೆರೆ ಹಿಡಿಯುವ ಕಾರ್ಯಾಚರಣೆ ಸಮಯದಲ್ಲಿ ಜನಜಂಗುಳಿ ನಿಯಂತ್ರಿಸಲು ಠಾಣೆಯಿಂದ ಸೂಕ್ತ ಅಧಿಕಾರಿ ಮತ್ತು ಸಿಬ್ಬಂದಿ ನಿಯೋಜಿಸಬೇಕು.
ಆನೆಗೊಂದಿ ವ್ಯಾಪ್ತಿಯ ಅಧಿಸೂಚಿತ ಅರಣ್ಯ ಪ್ರದೇಶದ ಸರ್ವೆ ನಂ. 1 ರಲ್ಲಿ ಹಾಗೂ ಸುತ್ತಲಿನ ಜನವಸತಿ ಪ್ರದೇಶದಲ್ಲಿ ಪಬ್ಲಿಕ್ ಅಡ್ರೆಸ್ ಸಿಸ್ಟಂ ನಿಂದ ಜನರಿಗೆ ಸೂಕ್ತ ಸುರಕ್ಷತೆಯಿಂದ ಇರಲು, ರಾತ್ರಿ ವೇಳೆಯಲ್ಲಿ ಒಂಟಿಯಾಗಿ ಅರಣ್ಯ ಪ್ರದೇಶದಲ್ಲಿ ಸುತ್ತಾಡದಂತೆ ಸೂಚನೆ ನೀಡಬೇಕು.
ದನ ಕರುಗಳು ಹಾಗೂ ಜಾನುವಾರುಗಳನ್ನು ಮೇಯಿಸಲು ದಟ್ಟ ಅರಣ್ಯದೊಳಗೆ ತೆರಳದಂತೆ ಸೂಚಿಸಬೇಕು. ಹುಲಿ ಕಾರ್ಯಾಚರಣೆಯನ್ನು ಕುತೂಹಲದಿಂದ ನೋಡಲು ಜನಜಂಗುಳಿ ಸೇರದಂತೆ ಪ್ರದೇಶ ವ್ಯಾಪ್ತಿಯಲ್ಲಿ ಗ್ರಾಮ ಪಂಚಾಯತ್‌ನಿಂದ ಡಂಗುರ ಸಾರಿಸುವುದ, ಪೊಲೀಸ್ ಬೀಟ್ ವ್ಯಾಟ್ಸ್ ಅಪ್ ಗುಂಪುಗಳಲ್ಲಿ ಜನರು ಸುರಕ್ಷತೆ ಕ್ರಮ ಅನುಸರಿಸಲು ಸೂಕ್ತ ಮಾಹಿತಿ ನೀಡಬೇಕು.
ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲನೆ ಮಾಡಿ, ಹುಲಿ ಹಿಡಿಯುವ ಕಾರ್ಯಾಚರಣೆ ಸಮಯದಲ್ಲಿ ಅವಶ್ಯವಿರುವ ಎಲ್ಲಾ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡು, ಮಾನವ-ಕಾಡು ಪ್ರಾಣಿ ಸಂಘರ್ಷಕ್ಕೆ ಎಡೆ ಮಾಡಿಕೊಡದಂತೆ ಸೂಕ್ತ ಕ್ರಮಗಳನ್ನು ಕೈಗೊಂಡು, ಕಾನೂನು ಮತ್ತು ಶಾಂತಿ ಸುವ್ಯವಸ್ಥೆ ಕಾಪಾಡಲು ಕ್ರಮವಹಿಸಲು ಆದೇಶಿಸಿದ್ದಾರೆ.

ಸತ್ಯವಾಯಿತು ಕಿಷ್ಕಿಂಧವಾಣಿ ಪತ್ರಿಕೆಯ ಸರಣಿ ವರದಿ… ಏಳುಗುಡ್ಡ ಪ್ರದೇಶದಲ್ಲಿ ಹುಲಿ ಇರುವುದನ್ನು ದೃಢಪಡಿಸಿದ ಅರಣ್ಯ ಇಲಾಖೆ.

 *ಸುತ್ತಲಿನ ಗ್ರಾಮಗಳ ಜನರಿಗೆ ಜಾಗೃತಿ ಯಿಂದ ಇರುವಂತೆ ಸೈರನ್ ಮುನ್ನೆಚ್ಚರಿಕೆ.

ಕಿಷ್ಕಿಂಧವಾಣಿ ಸುದ್ದಿ

ಕೆ.ನಿಂಗಜ್ಜ

ಗಂಗಾವತಿ: ತಾಲೂಕಿನ ಏಳುಗುಡ್ಡ ಪ್ರದೇಶದಲ್ಲಿ ಕಳೆದ ಮೂರು ತಿಂಗಳಿಂದ ಹುಲಿ ಇರುವ ಬಗ್ಗೆ ಸ್ಥಳೀಯರು ನೀಡಿದ ಮಾಹಿತಿ ಅನುಸರಿಸಿ ಕಿಷ್ಕಿಂಧವಾಣಿ ಕನ್ನಡ ದಿನಪತ್ರಿಕೆ ಮಾಡಿದ್ದ ಸರಣಿ ವರದಿಯ ಹಿನ್ನೆಲೆಯಲ್ಲಿ ಅರಣ್ಯ ಇಲಾಖೆಯವರು ಬೆಟ್ಟ ಪ್ರದೇಶಗಳಲ್ಲಿ ಅಳವಡಿಸಿದ್ದ ಸಿಸಿ ಕ್ಯಾಮರಾಗಳಲ್ಲಿ ಹುಲಿ ಇರುವ ಕುರಿತು ಅರಣ್ಯ ಇಲಾಖೆ ದೃಢಪಡಿಸಿದ್ದು, ರವಿವಾರ ತೆಂಬ ಪ್ರದೇಶದಲ್ಲಿ ಅಳವಡಿಸಿದ್ದ ಸಿಸಿ ಕ್ಯಾಮರಾದಲ್ಲಿ ಹುಲಿ ಸಂಚಾರ ಮಾಡಿದ್ದನ್ನು ಸೆರೆ ಹಿಡಿಯಲಾಗಿದ್ದು ಜಿಲ್ಲಾ ಅರಣ್ಯ ಇಲಾಖೆಯಿಂದ ಸಾಣಾಪೂರ, ಬಸಾಪೂರ,ಜಬ್ಬಲಗುಡ್ಡ, ಬೆಣಕಲ್,ಆಗೋಲಿ,ವೆಂಕಟಗಿ,ಹನುಮನಹಳ್ಳಿ, ಜಂಗ್ಲಿರಂಗಾಪೂರ ಭಾಗದಲ್ಲಿ ಸೈರನ್ ಹಾಕುವ ಮೂಲಕ ಸ್ಥಳೀಯರು,ಕುರಿಗಾಯಿಗಳು,ದನಗಾಯಿಗಳು ಹಾಗೂ ಗ್ರಾಮಸ್ಥರು ಏಳುಗುಡ್ಡ ಪ್ರದೇಶಕ್ಕೆ ತೆರಳಬಾರದು,ಒಬ್ಬಂಟಿಯಾಗಿ ತೆರಳಬಾರದು,ರಾತ್ರಿ ವೇಳೆ ಮನೆ ಹೊರಗೆ ಮಲಗಬಾರದು,ಕುರಿ,ದನ ಹಾಗೂ ಪಶು ಸಂಪತ್ತನ್ನು ರಕ್ಷಣೆ ಮಾಡಿಕೊಳ್ಳಬೇಕು.ಹುಲಿ ಕುರಿತು ಮಾಹಿತಿಯನ್ನು ಅರಣ್ಯ ಇಲಾಖೆಯ ಅಧಿಕಾರಿಗಳಿಗೆ ಕೂಡಲೇ ತಿಳಿಸಬೇಕೆಂದು ಅರಣ್ಯ ಇಲಾಖೆಯ ಅಧಿಕಾರಿಗಳು ಗ್ರಾಮಗಳಲ್ಲಿ ಮುನ್ನೆಚ್ಚರಿಕೆ ನೀಡಿದ್ದಾರೆ.

ಏಳು ಗುಡ್ಡ ಪ್ರದೇಶ ಕಳೆದ ಮೂರು ದಿನಗಳಿಂದ ಹೆಚ್ಚುವರಿ ಸಿಬ್ಬಂದಿಗಳನ್ನು ನಿಯೋಜನೆ ಮಾಡಲಾಗಿದ್ದು ಹೆಚ್ಚುವರಿಯಾಗಿ ಸಿಸಿ ಕ್ಯಾಮರಾಗಳನ್ನು ಜೋಡಣೆ ಮಾಡಲಾಗಿದೆ.

**

ಏಳುಗುಡ್ಡ ಪ್ರದೇಶದಲ್ಲಿ ಹುಲಿ ಇರುವ ಕುರಿತು ಸ್ಥಳಿಯರ ಮಾಹಿತಿ ಅನುಸರಿಸಿ ಸಿಸಿ ಕ್ಯಾಮರಗಳನ್ನು ಅಳವಡಿಸಲಾಗಿತ್ತು,ಸಿಸಿ ಕ್ಯಾಮರಾಗಳಲ್ಲಿ ಹುಲಿ ಸಂಚಾರ ಮಾಡಿರುವ ಕುರಿತು ಚಿತ್ರಗಳು ಮೂಡಿದ್ದು ತೆಂಬ ಪ್ರದೇಶದಲ್ಲಿ ಈ ಚಿತ್ರ ಸ್ಪಷ್ಟವಾಗಿದೆ. ಏಳು ಗುಡ್ಡ ಪ್ರದೇಶದಲ್ಲಿ ಹುಲಿ ಇರುವ ಕುರಿತು ಮೇಲಾಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದೆ. ಜೊತೆಗೆ ಏಳು ಗುಡ್ಡ ಪ್ರದೇಶದ ಸುತ್ತಲಿನ ಗ್ರಾಮಗಳ ಜನರಿಗೆ ಮುನ್ನೆಚ್ಚರಿಕೆಯಿಂದ ಇರುವಂತೆ ಅರಣ್ಯ ಇಲಾಖೆ ವತಿಯಿಂದ ಸೈರನ್ ಮೊಳಗಿಸಿ ಮುನ್ನೆಚ್ಚರಿಕೆ ನೀಡಲಾಗಿದೆ. ಜೊತೆಗೆ ಹೆಚ್ಚುವರಿ ಸಿಬ್ಬಂದಿಯನ್ನು ನಿಯೋಜನೆ ಮಾಡಲಾಗಿದೆ.

ಅಳವಡಿಸಿರುವ ಸಿಸಿ ಕ್ಯಾಮರಾಗಳಲ್ಲಿ ಒಂದು ಹುಲಿ ಮಾತ್ರ ಸೆರೆಯಾಗಿದ್ದು, ಈ ಹುಲಿ ಎಲ್ಲಿಂದ ಯಾವಾಗ ಬಂತು ಎನ್ನುವ ಕುರಿತು ಮಾಹಿತಿ ಸಂಗ್ರಹಿಸಲಾಗುತ್ತಿದೆ.

ಹುಲಿ ಇರುವ ಕುರಿತು ವನ್ಯಜೀವಿಗಳು ಸಂರಕ್ಷಣಾ ವಿಭಾಗದ ಹಿರಿಯ ಅಧಿಕಾರಿಗಳು ಹಾಗೂ ತಜ್ಞರಿಗೆ ಮಾಹಿತಿ ನೀಡಿದ್ದು ಅವರ ನಿರ್ದೇಶನದಂತೆ ಕ್ರಮ ವಹಿಸಲಾಗುತ್ತದೆ.

ಬೆಟ್ಟ ಪ್ರದೇಶದ ಸುತ್ತಮುತ್ತಲಿನ ಗ್ರಾಮಗಳ ಗ್ರಾಮಸ್ಥರು ಜಾಗೃತಿಯಿಂದ ಇರಬೇಕು.

ಕಳೆದೆರಡು ಮೂರು ತಿಂಗಳಿಂದ ಎಷ್ಟು ಕುರಿ,ಕೋಣ,ದನಗಳನ್ನು ಹುಲಿ ತಿಂದು ಹಾಕಿದೆ ಎನ್ನುವ ಕುರಿತು ಮಾಹಿತಿ ಸಂಗ್ರಹಿಸಲಾಗುತ್ತದೆ.

-ನಿರ್ಮಾಲ ಎನ್.ಕೆ.ಡಿಸಿಎಫ್(ಐಎಫ್ಎಸ್)ಕೊಪ್ಪಳ.

ಏಳುಗುಡ್ಡಪ್ರದೇಶದಲ್ಲಿ ಹುಲಿ ಪತ್ತೆ !,ಸಾಣಾಪೂರ, ಬಸಾಪೂರ ಭಾಗದಲ್ಲಿ ಬೆಟ್ಟಗಳತ್ತ ಹೋಗಲು ಭಯಗೊಂಡ ಜನರು !!

*ಮುನ್ನೆಚ್ಚರಿಕೆಯಾಗಿ ಅರಣ್ಯ ಇಲಾಖೆಯಿಂದ ಸಿಸಿ ಕ್ಯಾಮರಾಗಳ ಅಳವಡಿಕೆ

*ಹುಲಿ ಇರುವ ಪೊಟೋ, ವಿಡಿಯೋ ನೈಜತೆ ಪರೀಕ್ಷೆಯ ನಂತರ ಅಗತ್ಯ ಕ್ರಮಕ್ಕೆ ಇಲಾಖೆ ಸಿದ್ದತೆ

*ಮತ್ತಷ್ಟು ಆಯಕಟ್ಟಿನ ಜಾಗದಲ್ಲಿ ಸಿಸಿ ಕ್ಯಾಮರಾ ಅಳವಡಿಕೆ

*ಬೆಟ್ಟಗಳತ್ತ ತೆರಳದಂತೆ ಬೆಟ್ಟಗಳಂಚಿನ ಗ್ರಾಮಸ್ಥರಿಗೆ ಮುನ್ನೆಚ್ಚರಿಕೆ

ಕೆ.ನಿಂಗಜ್ಜ

ಕಿಷ್ಕಿಂಧವಣಿ ವಿಶೇಷ

ಗಂಗಾವತಿ: ಕಳೆದ ಎರಡು ತಿಂಗಳಿಂದ ಏಳುಗುಡ್ಡ ಪ್ರದೇಶದ ವ್ಯಾಪ್ತಿಯಲ್ಲಿ ಹುಲಿ ಇರುವ ಬಗ್ಗೆ ಸ್ಥಳೀಯರು ಮಾಹಿತಿ ನೀಡಿ ಆತಂಕ ವ್ಯಕ್ತಪಡಿಸುತ್ತಿರುವ ಕುರಿತು ಕಿಷ್ಕಿಂಧವಾಣಿ ದಿನ ಪತ್ರಿಕೆ ಸರಣಿ ವಿಸ್ತೃತ ವರದಿ ಪ್ರಕಟಿಸಿ ಏಳು ಬೆಟ್ಟಪ್ರದೇಶದಂಚಿನ ಗ್ರಾಮಗಳ ಜನರಿಗೆ ಮುನ್ನೆಚ್ಚರಿಕೆ ಕುರಿತು ಮಾಹಿತಿ ನೀಡುವ ಜತೆಗೆ ನಿರಂತರವಾಗಿ ಅರಣ್ಯ ಇಲಾಖೆಯವರ ಗಮನಕ್ಕೆ ತಂದು ಆಯಕಟ್ಟಿನ ಜಾಗದಲ್ಲಿ ಸಿಸಿ ಕ್ಯಾಮರಾ ಅಳವಡಿಕೆ ಕಾರಣವಾಗಿತ್ತು. ಇದೀಗ ಶುಕ್ರವಾರ ತಾಲೂಕಿನ ಸಾಣಾಪೂರ, ಬಸಾಪೂರ ಪ್ರದೇಶದ ಬೆಟ್ಟ ಪ್ರದೇಶದಲ್ಲಿ ಹುಲಿ ಸಂಚಾರ ಮಾಡಿರುವ ಕುರಿತು ಸಿಸಿ ಕ್ಯಾಮರಗಳಲ್ಲಿ ಹುಲಿಯ ಪೊಟೋ ಸೆರೆಯಾಗಿದ್ದು ಕೆಲ ವ್ಯಕ್ತಿಗಳ ಸೊಶೀಯಲ್ ಮೀಡಿಯಾಗಳಲ್ಲಿ ಹುಲಿಯ ಪೊಟೋಗಳು ವೈರಲ್ ಆಗಿರುವ ಕುರಿತು ಮಾಹಿತಿ ಇದ್ದು ಈ ಕುರಿತು ಜಿಲ್ಲಾ ಅರಣ್ಯ ಸಂರಕ್ಷಣಾಧಿಕಾರಿ ನಿರ್ಮಲಾ ಎನ್.ಕೆ. ಅವರು ಪೋಟೋ ನೈಜತೆ ಬಗ್ಗೆ ಪರಿಶೀಲನೆಯ ನಂತರ ಹುಲಿ ಇರುವ ಕುರಿತು ದೃಢಪಡಿಸಲಾಗುವುದು ಎಂದು ಕಿಷ್ಕಿಂಧವಾಣಿಗೆ ಮಾಹಿತಿ ನೀಡಿದ್ದಾರೆ.

ಕಳೆದ ತಿಂಗಳು ಸಮೀಪದ ಜಬ್ಬಲಗುಡ್ಡ ಹಾಗೂ ಕುಮಾರರಾಮನ ಬೆಟ್ಟ ಪ್ರದೇಶದಲ್ಲಿ ಹುಲಿ ಇರುವ ಬಗ್ಗೆ ಗ್ರಾಮಸ್ಥರು ಆತಂಕ ವ್ಯಕ್ತಪಡಿಸಿ ಕಿಷ್ಕಿಂಧವಾಣಿಗೆ ಹುಲಿ ಸಂಚಾರ ಮಾಡಿದ ಜಾಗದಲ್ಲಿ ಬೃಹತ್ ಗಾತ್ರದ ಹೆಜ್ಜೆಗಳ ಪೊಟೋಗಳನ್ನು ತೆಗೆದು ಕಳಿಸಿ ಅರಣ್ಯ ಇಲಾಖೆಯವರು ಕೂಡಲೇ ಮುನ್ನೆಚ್ಚರಿಕೆ ಕ್ರಮ ವಹಿಸುವಂತೆ ಮನವಿ ಮಾಡಿದ್ದರು. ಈ ಕುರಿತು ಪತ್ರಿಕೆ ವಿಶೇಷ ವರದಿ ಪ್ರಕಟಿಸಿದ ನಂತರ ಅರಣ್ಯ ಇಲಾಖೆಯವರು ಹುಲಿ ಹೆಜ್ಜೆ ಮೂಡಿದ ಸ್ಥಳಕ್ಕೆ ಭೇಟಿ ನೀಡಿ ಅಗತ್ಯ ಮಾಹಿತಿ ಸಂಗ್ರಹಿಸಿ ಮೇಲಾಧಿಕಾರಿಗಳಿಗೆ ವರದಿ ನೀಡಿದ್ದರು.ನಂತರ ಇಡೀ ಏಳುಗುಡ್ಡ ಪ್ರದೇಶದ ಆಯಕಟ್ಟಿನ ಸ್ಥಳದಲ್ಲಿ ಅರಣ್ಯ ಇಲಾಖೆ ಆಯಕಟ್ಟಿನ ಸ್ಥಳಗಳಲ್ಲಿ ಸಿಸಿ ಕ್ಯಾಮರಾ ಜೋಡಣೆ ಮಾಡಿತ್ತು. ನಂತರ ರಂಗಾಪೂರ ಜಂಗ್ಲಿ, ಬಸಾಪೂರ ಈ ಭಾಗದಲ್ಲಿ ಕೋಣ,ದನ, ಕುರಿ ಮತ್ತು ಇತರೆ ಪ್ರಾಣಿಗಳನ್ನು ಹೊತ್ತುಕೊಂಡು ಹೋಗಿರುವ ಕುರಿತು ದನಗಾಯಿಗಳು ಮತ್ತು ಕುರಿಗಾಯಿಗಳು ದೃಢಪಡಿಸಿದ್ದರೂ ಅರಣ್ಯ ಇಲಾಖೆಯವರು ಬೃಹತ್ ಗಾತ್ರದ ಚಿರತೆ ಬೇರೆಡೆಯಿಂದ ಬಂದಿರಬಹುದು ಹುಲಿ ಇಲ್ಲ ಎಂದು ಜನರಿಗೆ ಮಾಹಿತಿ ನೀಡಿದ್ದರು.

ಶುಕ್ರವಾರ ಬೆಳ್ಳಿಗ್ಗೆ ಬಸಾಪೂರ ಭಾಗದಲ್ಲಿ ಅಳವಡಿಸಿರುವ ಸಿಸಿ ಕ್ಯಾಮರಾದಲ್ಲಿ ಹುಲಿ ಸಂಚಾರ ಮಾಡಿರುವ ಕುರಿತು ಚಿತ್ರ ಮೂಡಿದ್ದು ಹುಲಿ ಇರುವ ಕುರಿತು ಇದೀಗ ಅಧಿಕೃತಗೊಂಡಂತಾಗಿದೆ. ಆದರೂ ಅರಣ್ಯ ಇಲಾಖೆಯವರು ಇದನ್ನು ಇನ್ನೂ ದೃಢಪಡಿಸಿಲ್ಲವಾದರೂ ಏಳುಗುಡ್ಡ ಪ್ರದೇಶ ವ್ಯಾಪ್ತಿಯ ಗ್ರಾಮಮಗಳಲ್ಲಿ ಈಗಾಗಲೇ ಮುನ್ನೆಚ್ಚರಿಕೆಯಾಗಿ ಜನರು ಜಾಗೃತಿಯಿಂದ ಇರುವಂತೆ ಮಾಹಿತಿ ನೀಡಲಾಗಿದೆ. ಮತ್ತಷ್ಟು ಸಿಸಿ ಕ್ಯಾಮರಾಗಳನ್ನು ಅಳವಡಿಸುವ ಕುರಿತು ಜಿಲ್ಲಾ ಅರಣ್ಯ ಸಂರಕ್ಷಣಾಧಿಕಾರಿಗಳು ಸೂಚನೆ ನೀಡಿದ್ದಾರೆ.

ಹುಲಿಗಳಿರುವ ಅರಣ್ಯ ಸಮೃದ್ಧಿಯ ಸಂಕೇತ: ಒಂದು ಮೂಲದ ಪ್ರಕಾರ ಹುಲಿಗಳಿರುವ ಅರಣ್ಯ ಪ್ರದೇಶವು ಸಮೃದ್ದಿಯ ಸಂಕೇತವಾಗಿದ್ದು ಅರಣ್ಯ ಪ್ರದೇಶದಲ್ಲಿ ಗುಡಮರಗಳ ಸಂರಕ್ಷಣೆ ಜತೆಗೆ ಇತರೆ ಪ್ರಾಣಿಗಳ ಸಂಖ್ಯೆಯೂ ಹೆಚ್ಚಾಗುತ್ತದೆ. ಅರಣ್ಯ ಪ್ರದೇಶದಲ್ಲಿ ಮನುಷ್ಯರ ಪ್ರದೇಶ ಗಿಡ,ಮರ ಕಲ್ಲುಗಳ ನಾಶ ಕಮ್ಮಿಯಾಗಿ ಸಸ್ಯರಾಶಿ ಹೆಚ್ಚಾಗುತ್ತದೆ. ಆದ್ದರಿಂದ ಹುಲಿ ಇರುವ ಕಾಡು ಸಮೃದ್ಧಿಗೆ ಪೂರಕ ಎನ್ನುವ ಮಾತು ವನ್ಯಜೀವ ಪ್ರಪಂಚದಲ್ಲಿ ವ್ಯಾಪಕವಾಗಿದೆ.

**

ಏಳುಗುಡ್ಡ ಪ್ರದೇಶದ ಅರಣ್ಯದಲ್ಲಿ ಹುಲಿ ಇರುವ ಕುರಿತು ಹಲವು ಗ್ರಾಮಗಳ ಗ್ರಾಮಸ್ಥರು ಆತಂಕ ವ್ಯಕ್ತಪಡಿಸಿದ್ದರಿಂದ ಈಗಾಗಲೇ ಆಯಕಟ್ಟಿನ ಜಾಗದಲ್ಲಿ ಸಿಸಿ ಕ್ಯಾಮರಾ ಅಳವಡಿಸಲಾಗಿದೆ. ಶುಕ್ರವಾರ ಸೊಶೀಯಲ್ ಮೀಡಿಯಾದಲ್ಲಿ ಹುಲಿಯ ಪೊಟೋ ಜತೆ ಬಸಾಪೂರ ಅರಣ್ಯದಲ್ಲಿ ಹುಲಿ ಇದೆ ಎನ್ನುವ ಮಾಹಿತಿಯನ್ನು ಕೆಲವರು ತಮಗೆ ಕಳಿಸಿದ್ದು, ಈ ಕುರಿತು ಪೊಟೋಗಳ ನೈಜತೆ ಪರಿಶೀಲನೆ ಮಾಡಲಾಗುತ್ತದೆ. ಜತೆಗೆ ಮತ್ತಷ್ಟು ಸಿಸಿ ಕ್ಯಾಮರಾ ಅಳವಡಿಸುವ ಜತೆಗೆ ಏಳುಗುಡ್ಡ ಪ್ರದೇಶದ ಅರಣದಯದಂಚಿನಲ್ಲಿರುವ ಗ್ರಾಮಗಳ ಜನರಿಗೆ ಮುನ್ನೆಚ್ಚರಿಕೆಯ ಮಾಹಿತಿಯನ್ನು ಅರಣ್ಯ ಇಲಾಖೆ ವತಿಯಿಂದ ತಿಳಿಸಲಾಗಿದೆ. ಮತ್ತಷ್ಟು ಪರಿಶೀಲನೆ ಮತ್ತು ಈಗ ಹರಿದಾಡುತ್ತಿರುವ ಪೊಟೋ ನೈಜತೆ ಬಂದ ನಂತರ ಹುಲಿ ಇರುವ ಕುರಿತು ಮುನ್ನೆಚ್ಚರಿಕೆಯ ಮಾಹಿತಿಯನ್ನು ನೀಡಲಾಗಿದ್ದು, 20 ಸಿಸಿ ಕ್ಯಾಮರಾ ಅಳವಡಿಕೆ ಮಾಡಲಾಗುತ್ತದೆ.

*ನಿರ್ಮಲಾ ಎನ್.ಕೆ.ಉಪ ಅರಣ್ಯ ಸಂರಕ್ಷಣಾ ಅಧಿಕಾರಿಗಳು (ಐಎಫ್‌ಎಸ್) ಕೊಪ್ಪಳ.